Bu gün Ukraynanın səfiri Yuriy Husyev Azərbaycan Diplomatik Akademiyasını — ADA Universitetini ziyarət edib və universitetin rəhbərliyi ilə məzmunlu işgüzar görüş keçirib. Görüşdə ADA Universitetinin prorektoru, Azərbaycan Respublikası Milli Məclisinin deputatı Fariz İsmayılzadə və prorektor Günay Ziyadova iştirak ediblər.

Tərəflər ADA Universiteti ilə Ukrayna Xarici İşlər Nazirliyi yanında Gennadiy Udovenko adına Ukrayna Diplomatik Akademiyası arasında əməkdaşlığın genişləndirilməsi istiqamətində praktiki addımları müzakirə ediblər. Xüsusilə birgə elmi konfransların keçirilməsi, akademik mübadilələr, tələbələr və gənc diplomatlar üçün proqramlar diqqət mərkəzində olub.

Ukraynanın səfiri Yuriy Husyev Azərbaycan tərəfdaşlarına Ukraynaya göstərilən ardıcıl dəstəyə görə, həmçinin ötən il Ukrayna Xarici İşlər Nazirliyinin iki gənc diplomatının qısamüddətli təhsil üçün ADA Universitetinə dəvət edilməsinə görə ayrıca təşəkkür edib və vurğulayıb ki, bu cür qarşılıqlı əməkdaşlıq ölkələrimizin gələcəyinə, eləcə də ümumi təhlükəsizlik və inkişaf məkanına yatırılan bir investisiyadır.

Görüşün nəticəsi olaraq, tərəflər əməkdaşlığın bundan sonra da dərinləşdirilməsi və onun yeni praktik məzmunla zənginləşdirilməsi barədə razılığa gəliblər.

Ukrayna və Azərbaycan — ortaq tarix, qarşılıqlı hörmət və gələcəyə dair strateji baxışla birləşən tərəfdaş ölkələrdir.