Azərbaycan Respublikası Prezidentinin Naxçıvan Muxtar Respublikasında səlahiyyətli nümayəndəsi Ceyhun Cəlilov ilə keçirilən görüş zamanı regionlararası əlaqələrin inkişaf perspektivləri, humanitar əməkdaşlıq, həmçinin mədəniyyət, təhsil və elm sahələrində əməkdaşlığın genişləndirilməsi imkanları müzakirə olunub.
Ukraynanın Səfiri Rusiyanın genişmiqyaslı işğalının ilk günlərindən etibarən Azərbaycanın Ukraynaya göstərdiyi dəstəyə və mühüm yardıma görə minnətdarlığını ifadə edib.
Tərəflər regionlararası əməkdaşlığın müxtəlif sahələrdə inkişaf etdirilməsi məqsədilə atılacaq konkret növbəti addımlar barədə razılığa gəliblər.
Naxçıvanda olduğu müddətdə Ukraynanın Səfiri Yuriy Husyev Azərbaycan xalqının Ümummilli Lideri Heydər Əliyevin xatirəsini ehtiramla yad edib. O, Ulu Öndərin abidəsini ziyarət edərək önünə gül dəstəsi qoyub, həmçinin Naxçıvanda doğulmuş və uzun illər yaşamış Heydər Əliyevin Muzeyini ziyarət edib. Səfir eyni zamanda muxtar respublikanın zəngin tarixi-mədəni irsi ilə tanış olub.
Bu işgüzar səfər Ukrayna ilə Azərbaycan Respublikasının regionları arasında tərəfdaşlıq və əməkdaşlığın daha da dərinləşdirilməsi istiqamətində növbəti mühüm addım olub.