Global Baku Forum çərçivəsində bu gün “Ukraine: From War to Peace” adlı mühüm müzakirə keçirildi. Müzakirə Rusiyanın Ukraynaya qarşı aqressiyası nəticəsində Avropa və dünya qarşısında yaranmış təhlükəsizlik çağırışlarına həsr olunmuşdu.
Ukraynanın səfiri
Yuriy Husyev Latviyalı siyasətçi, Latviyanın 2010–2014 və 2019–2022-ci illərdə baş nazirinin müavini və müdafiə naziri olmuş Artis Pabriks ilə birlikdə Avropa və qlobal təhlükəsizliyin əsas məsələlərini, müharibənin beynəlxalq nizama təsirlərini, həmçinin ədalətli və dayanıqlı sülhə nail olma yollarını müzakirə etdi. Müzakirəni tanınmış jurnalist Jaffar Hasnain moderasiya etdi.
Tərəflər vurğuladılar ki, Rusiyanın Ukraynaya qarşı səbəbsiz və əsassız aqressiyası təkcə bir dövlətə qarşı müharibə deyil, həm də beynəlxalq hüquq sistemi və qlobal təhlükəsizlik üçün ciddi bir çağırışdır. Rusiya Ukrayna şəhərlərini hər gün atəşə tutur, dinc sakinləri qətlə yetirir və kritik infrastrukturu dağıtmağa davam edir.
Məhz buna görə beynəlxalq ictimaiyyət daha qətiyyətli hərəkət etməlidir: Rusiyaya qarşı siyasi, iqtisadi və sanksiya təzyiqini gücləndirməli, Ukraynaya dəstəyi möhkəmləndirməli və törədilmiş cinayətlərə görə ədalətin və məsuliyyətin təmin edilməsi istiqamətində birgə çalışmalıdır.
Ukraynanın ərazi bütövlüyü bərpa olunmadan, beynəlxalq hüquqa riayət edilmədən və gələcək nəsillər üçün təhlükəsizlik təminatları yaradılmadan Avropada sülh mümkün deyil.
Hər il Rövşən Muradovun rəhbərliyi ilə Nizami Ganjavi International Center komandası tərəfindən uğurla təşkil olunan Global Baku Forum çərçivəsində keçirilən bu müzakirə bir daha təsdiqlədi ki, Ukraynaya dəstək Avropada və dünyada sabitliyin və demokratik dəyərlərin qorunmasının əsas elementlərindən biridir.
Səfir həmçinin Ukraynaya və azadlıq və müstəqillik uğrunda mübarizəmizə göstərilən dəstəyə görə bütün beynəlxalq tərəfdaşlara səmimi təşəkkürünü bildirdi.