Ukrayna Prezidenti Volodimir Zelenski Qəbələdə Azərbaycan Prezidenti Ilham Əliyev ilə təkbətək və geniş tərkibdə görüşlər keçirib. Görüşlər zamanı təhlükəsizlik, enerji və humanitar dəstək sahələrində əməkdaşlıq müzakirə olunub. Bu, dövlət başçısının dörd ildən artıq müddətdə Azərbaycana ilk səfəri və liderlərin yeddinci görüşüdür.

“Mən Azərbaycanın suverenliyimizə və ərazi bütövlüyümüzə verdiyi dəstəyə görə təşəkkür edirəm. Heç bir şübhə yoxdur ki, Ukrayna da hər zaman Azərbaycanın ərazi bütövlüyünü və suverenliyini dəstəkləyib”, — deyə Volodimir Zelenski vurğulayıb.

Görüş zamanı müxtəlif sahələri, o cümlədən müdafiə əməkdaşlığını əhatə edən altı ikitərəfli sənəd imzalanıb. Ukrayna Prezidentinin sözlərinə görə, əməkdaşlığın prioritet istiqaməti hazırda məhz təhlükəsizlik və birgə istehsaldır. Ilham Əliyev  isə dövlətlər arasında hərbi-texniki əməkdaşlığın potensialını qeyd edib.

“Keçən il iki mühüm hadisə baş verdi. Bakıda xarici işlər nazirlərimizin məsləhətləşmələri keçirildi. Həmçinin hökumətlərarası komissiyanın iclası baş tutdu. Bu gün söhbətimiz zamanı Ukraynada daha bir görüşün keçirilməsi barədə razılığa gəldik. Fikir mübadiləsi apardıq və qısa desək, bu gün kifayət qədər ciddi əməkdaşlığımız var. Bu gün bu əməkdaşlıq bir daha təsdiqləndi”, — deyə Azərbaycan Prezidenti Ilham Aliyev əlavə edib.

Prezident ayrıca ukraynalı uşaqların sağlamlaşdırılmasına göstərilən yardımı yüksək qiymətləndirib. Azərbaycan artıq cəbhəyanı bölgələrdən olan 500-dən çox ukraynalı uşağı qəbul edib. Həmçinin Volodimir Zelenski qeyd edib ki, azərbaycanlı tələbələr təhsil almaq üçün Ukraynanı seçirlər. Liderlər bu sahədə təhsil əməkdaşlığının davam etdirilməsi barədə razılığa gəliblər.

Layiqli sülhə nail olmaq istiqamətində səylərə də xüsusi diqqət ayrılıb. Ukrayna Prezidenti təhlükəsizlik vəziyyəti və Rusiyanın davamlı hücumları, o cümlədən bu gün Ukrayna şəhərləri və icmalarına endirilən zərbələr barədə məlumat verib.

“Bu prosesin vasitəçiliyində tərəfdaşlarımızın rolunu yüksək qiymətləndiririk. Azərbaycan Prezidenti ilə bölüşdük ki, üçtərəfli danışıqlara hazırıq. Türkiyədə belə danışıqlarımız olub. İsveçrədə amerikalı tərəfdaşlarımızla da bu formatda görüşlər keçirmişik. Şübhəsiz, əgər Rusiya diplomatiyaya hazır olarsa, Azərbaycanda yaxın danışıqlara da hazırıq”, — deyə Volodimir Zelenski bildirib.