Energetika qurumlarının rəhbərləri Ukraynanın enerji sisteminin vəziyyətini və Ukrayna və Azərbaycan liderləri – Volodimir Zelenski və İlham Əliyev arasında yaxın vaxtlarda Münxendə Təhlükəsizlik Konfransı çərçivəsində keçirilmiş görüş zamanı əldə olunmuş razılaşmaların icrasını müzakirə ediblər.

Bundan əvvəl Ukraynanın Azərbaycandakı Səfiri Yuriy Husyev Azərbaycan Respublikasının energetika naziri Pərviz Şahbazov ilə ayrıca məhsuldar görüş keçirib. Görüş zamanı Ukraynaya göstərilən ardıcıl dəstəyə, xüsusilə təqdim edilən enerji avadanlıqları və humanitar yardıma görə təşəkkürünü bildirib. Bu dəstək davam edən Rusiya təcavüzü şəraitində Ukraynanın enerji sisteminin dayanıqlığının gücləndirilməsinə mühüm töhfə verir. Həmçinin enerji sahəsində ikitərəfli əməkdaşlığın daha da dərinləşdirilməsi istiqamətində atılacaq praktiki addımlar da ətraflı müzakirə olunub. Xüsusilə qaz təchizatının diversifikasiyası, Ukraynanın qaz anbarlarının potensialından istifadə və hər iki ölkənin dövlət və özəl enerji şirkətləri arasında əməkdaşlığın genişləndirilməsi məsələlərinə toxunulub.

Ukrayna Azərbaycanın göstərdiyi həmrəyliyi yüksək qiymətləndirir və enerji sahəsində strateji tərəfdaşlığın daha da inkişaf etdirilməsinə sadiqdir.