Diplomatik nümayəndəliklərin rəhbərlərinin ilk iclas günü çərçivəsində Ukraynanın xarici işlər naziri Andriy Sıbıha cəbhə bölgəsində yaralıların təxliyəsi üçün nəzərdə tutulmuş yerüstü robotlaşdırılmış komplekslərin alınmasına yönəlmiş ianə kampaniyasının başladıldığını elan edib. Həyat xilas edən bu robotların Ukrayna hərbi bölmələrinə çatdırılması məqsədilə vəsait toplanmasına Ukrayna Xarici İşlər Nazirliyi və Prezident Volodimir Zelenskinin təşəbbüsü ilə yaradılmış UNITED24 fond platforması birgə başlayıb.

Bu təşəbbüsə dünyanın müxtəlif bölgələrində fəaliyyət göstərən Ukrayna diplomatik nümayəndəlikləri, diaspor təşkilatları və beynəlxalq tərəfdaşlar da qoşulacaq. “Ukrayna diplomatiyası hər gün ölkəmizin müdafiəsi üçün çalışır. Biz sistemli şəkildə tərəfdaşlarla Hava Hücumundan Müdafiə sistemləri, texnika, sursatlar və müdafiə sənayesinə investisiyalarla bağlı konkret razılaşmalar əldə edirik. Müdafiə texnologiyalarının, o cümlədən yerüstü robot sistemlərinin dəstəklənməsi həyatların qorunması naminə unikal innovasiyaların genişlənməsinə şərait yaradır. Diplomatiya ordumuzu dəstəkləyir və bu ianə kampaniyası – döyüş qabiliyyətimizin gücləndirilməsinə birbaşa töhfədir,” – deyə Ukraynanın xarici işlər naziri Andriy Sıbıha bildirib.

Cəbhədə yerüstü robotlaşdırılmış komplekslər xüsusilə təhlükəli və çətin keçilən ərazilərdə tapşırıqları yerinə yetirmək iqtidarındadır. Bu, əməliyyatların səmərəliliyini artırmaqla yanaşı, Ukrayna hərbçilərini düşmən pilotsuz aparatlarından və artilleriya atəşindən qorumağa kömək edir.

Yığım çərçivəsində aşağıdakı modellər də daxil olmaqla müxtəlif növ robotlar üçün vəsait toplanacaq: Targan 300, “Volya-E”, TerMIT, Ardal 920, Ratel H, “Zmiý”, Bro-1409, Thor 1000/800 və “Teslya”.

•    Təxliyə robotları – yaralıların ön cəbhədən çıxarılmasını, xilasetmə qruplarını təhlükəyə atmadan təmin edir.

    •    Logistika robotları – universal platformalardır; ərzaq, sursat və avadanlıqları mövqelərə çatdırır, eyni zamanda radioelektron mübarizə vasitələri və uzaqdan video müşahidə sistemləri quraşdırmaq imkanına malikdirlər.

    •    Minatəmizləyici robotlar – kəşfiyyat, müşahidə və minalardan təmizləmə işlərində istifadə olunur. Onlar tələləri, piyada və tank əleyhinə minaları zərərsizləşdirərək qoşun və texnikanın təhlükəsiz keçidini təmin edir. Məsələn, on “Zmiý” robotu gündə 20 hektaradək ərazini təmizləyə bilər.

Yerüstü robot sistemləri müasir müharibədə əvəzolunmaz vasitəyə çevrilib. Onlar insanların həyatını riskə atmadan döyüş qabiliyyətini artırır və texnoloji üstünlük baxımından yeni mərhələ açır.

Bu yeni ianə kampaniyasını dəstəkləyin və Ukrayna müdafiəçilərinin həyatını xilas etməyə kömək edin.