ADA Universiteti tərəfindən AIDA (Azerbaijan International Development Agency — Azərbaycan Respublikası Xarici İşlər Nazirliyi yanında Azərbaycan Beynəlxalq İnkişaf Agentliyi) ilə birgə təşkil olunan “Advanced Foreign Service Program for Foreign Diplomats” (Xarici diplomatlar üçün təkmilləşdirilmiş diplomatik xidmət proqramı) başa çatıb.

Proqramda Ukrayna Xarici İşlər Nazirliyinin gənc diplomatları Artem Taxtarov və Yehor Podobnı iştirak ediblər. Onlar təlim proqramını uğurla başa vuraraq müvafiq sertifikatlar əldə ediblər.

Proqram beynəlxalq münasibətlər, xarici siyasət, diplomatiya və regional təhlükəsizlik sahələrində biliklərin dərinləşdirilməsi, peşəkar bacarıqların təkmilləşdirilməsi, eləcə də digər ölkələrdən olan həmkarlarla təcrübə mübadiləsinin aparılması baxımından mühüm imkan yaradıb.

Ukraynanın Azərbaycandakı səfiri Yuriy Husyev Azərbaycan Respublikasının Xarici İşlər Nazirliyinə, ADA Universitetinin və AIDA-nın kollektivlərinə bu mühüm təhsil təşəbbüsünün təşkilinə, ukraynalı diplomatların peşəkar inkişafına göstərilən diqqətə və ən əsası, Ukraynaya göstərilən sarsılmaz dəstəyə görə səmimi minnətdarlığını bildirib.

Bu cür proqramlar gənc diplomatların peşəkar inkişafına töhfə verməklə yanaşı, ölkələrimiz arasında dostluq əlaqələrini möhkəmləndirir, əməkdaşlıq imkanlarını genişləndirir və Ukrayna–Azərbaycan strateji tərəfdaşlığının gələcək inkişafı üçün möhkəm zəmin yaradır.

Ukrayna ilə həmrəyliyə və Ukrayna xalqına göstərilən dəstəyə görə Azərbaycana təşəkkür edirik!